المعدوس طبعاً هذي الطبخة تعمل بكثرة أيام الأجواء الشتوية ولما يكون الجو ممطر أو مغيم

المعدوس [ الرز بالعدس ] وهذي الطبخة طبعاً معروفة إنووو زمان ولوقتنا الحاضر كانوو الناس وخصوصا في الحجاز مكة وجدة والمدينة وكثير من الناس من يوم مايشوفوو الجوو مغيم وممطر تشموو ريحة المعدوس طالعة من كل بيت وهذي العادة لين وقتنا الحاضر في ناس محافظين عليها وفي ناس يضيفوو في السفرة كمان السمك المقلي وهذي عادة وخصوصا عند العجايز من يوم ماتشوفوو صحن المعدوس تشوفوو جمبوو كمان صحن السمك المقلي وذي ماقلتلكم المعدوس يعتبر من الطبخات الشتوية يعني لما يكون الجووو يعيني مغيم او ممطر وطبعاً شي اكيد الجيران لهم نصيب من هذي الطبخات الا لها مناسبات خاصة عكس دحين تروح تودي للجيران طبخة معينة تلقا الأدمي الا ياخذ منك الصحن يبحلق فيك وشكلوو في قلبوا يقول ليش حنا شحاتين ياحسافة بس عموما لا اطيل عليكم اتركم مع الوصفة .

المقادير :

كاسه رز
كاستين عدس
بصلتين مفرومه
ملعقة اكل ثوم مفروم ومطحون ناعم
ملعقة صغيره كركم
ملح حسب الرغبة
سمن او زيت لتحمير البصل

الطريقة
نحمر البصل لين يذبل وبعدين نحط الثوم وبعدين العدس والكركم والرز ونقلبهم

طبعا نكون حطينا مويه تغطي الرز والعدس وبعد مايغلي نــوطــي النار شويه لين

يستوي ويكون شبه سائل يعني كانو مطحون مع بعضه0

وبعد الغرف نحط على الوجه شوية سمن ويقدم مع مخلل الليمون و سطة حمر وغالبا سمك مقلي

اتمنى بس انوو الشرح وافي

وإذا في شي موو واضح بامكانكم تعزموو من اقاربكم وحدة تكون كبيرة بالسن حتشوفوو الفن والطبخ الأصيل وصدقووني وصدقوني كبار السن بصفة عامة يفرحوا لما يشوفوو الأحفاد والأبناء يوجهوو لهم اسئلة وإستفسارات تلقا الواحد فيهم يحس فعلا انوو لو مكانتوو في العائلة وصدقوني أكل السوق تكرهوو اليوم الا فكرتوو فيلوو انكم تشتروو منوو حتشوفوو اختلاف كبير من جميع النواحي .

وبالعافية

يسلمووووووووو ...........

ياخيو على الاكله الحلووه.............

الله يسلمك

ألف شكر على الطلة الرائعة

» سؤال للجريئين فقط..........الجواب يكون بصراحه ..